Dadam so`zin tinglagim kelar,
Bag`rida bir uxlagim kelar,
Quchib-quchib yig`lagim kelar,
Yoshligimga qaytgim keladi.
Onam yopgan issiq nonlarni,
Eslab do`st-u qadrdonlarni,
Sog`indimda o`sha onlarni,
Yoshligimga qaytgim keladi.
Olislardan chorlar bir nigoh,
Qaytolmasam mendami gunoh?
Ilk sevgimga yagona guvoh –
Yoshligimga qaytgim keladi.
Umr asli besh kunlik safo,
Gohi safo, gohida jafo,
Tashlab ketgan o`sha bevafo
Yoshligimga qaytgim keladi.
Siz ham mendek ezilgan chog`da,
Kezganmisiz xazonli bog`da?
Qo`msab A’zam yuragi dog`da,
Yoshligimga qaytgim keladi.
Yoshligimga qaytgim keladi,
Yoshligimga qaytgim keladi,
Sog`inganda o`sha onlarni,
Yoshligimga qaytgim keladi.
