Avvalo hech kimsaning boshiga ish tushmasin,
Ish tushsa gar boshiga, chin do’stlari qochmasin.
Qochsalar chin do’stlari yana bag’rin ochmasin,
Do’stning do’st ekanligin ishing tushsa bilarsan.
Chin do’stlar yo’g’ingda do’st, yiqilgan chog’ingda do’st,
Bemor bo’lsang holingdan xabar olsa shunda do’st.
Do’stim yo’q deb kuyinma, izlama hech urinma,
Xudo bersa dastingga bosgan qadamingda do’st.
Davlatingning borida yurar gaping ma’qullab,
Yoningda hamroh bo’lar, xato qilishing poylab.
Gar qoqilsang yo’lingda, kelmaydi bir bor yo’qlab,
Do’stning do’st ekanligin ishing tushsa bilarsan.
Unday do’stlar shuhrating uzoqdan payqaydilar,
Sovg’a-salomlar olib, har kuni yo’qlaydilar.
Ishonma hech ularga, ular do’st bo’lmaydilar,
Do’stning do’st ekanligin ishing tushsa bilarsan.
